Tagebuch KALA 2013

Vor kurzem ist auf mysteriöse Weise das Tagebuch des Kantonslagers 2013 wieder aufgetaucht – Tag für Tag gewissenhaft aufgezeichnet von den Pfadis selbst. Das möchten wir euch nicht vorenthalten, also viel Spass beim Schwelgen in Erinnerungen!

15. Juli 2013: KALA-Areis

Mir hän uns am frühe Morge am Bahnhof troffe und hän mit de andere d Reis zum Lagerplatz atträtte. Wo mir ako sind, simmer grad ins stuune ko. Überall sind Türm, Zelter und Pfadis gsi. Denn simmer zu unserem Lagerplatz gange und hän agfange unseri Zälter ufstelle.
Denoch hämmer unser Zmittag gässe und hän witer ufbaut.
Denn isch e Gauklerin ko und mit däre hämmer denn Spieli gspielt.
Spöter hän mer denn e feins Znacht gässe.

Eröffnigsfir

Nachdäm mir uns alli im Dorfzentrum versammlet hän, hän mir d Aurelia und de Till Eulenspiegel kenneglernt.
Als ersts het är uns en luustigee (schins) Streich gspielt. Denoch hän mir unsere Erkennigsruef vom Dorf güebt. Denn hän mir uns alli vor dr Hauptbühni versamlet. Dört hän mir denn die andere Lagerdörfer kenneglernt. Und denn hets PARTY geh!

16. Juli 2013: Flossbau

Am morge het uns d Gauklerin gweckt und het uns e Zettel gä.
Dört druf gstande, dass mir werde go Floss baue.
Dorum hän mir schnell Zmorge gässe und sin losglofe.
Wommer dört ako sin hämmer müesse unseri Floss baue und sin ab ufs Wasser. Dört hets e riiese Wasserschlacht gä. Denn simmer wieder hei gloffe und es het Zmittag gä. Nach em Zmittag hän mir d Ämptli gmacht, nach de Ämptli het de Hyde gseit mir hän 2 Stunde frei! =) Nach 2 Stunde hets Z’vieri gäh. Donoch isch dr Gauklerin vo uns welle das mir ihre Sache zeige, wo in dr Pfadi tradition sind. Mir hän 2 Postelauf gmacht. 1 Postelauf: Singe, 2 Postelauf: Kurzspieli. Mir hän s Schalbärglied (obe), father & son, es Kalalied und House of the rising sun gsunge. Als 2 Postelauf hän mir Spiel gmacht: Elchen, Ritter auf Ritter ab, und Wärwölfle gspielt. Nach däm hets Znacht gäh. Nachem Znacht hets gheisse mir mien langi hose a lege. Als mir mit lange hose und Wanderschuh & Taschelampe sind mir los glofe. Als mir and däre grosse Wiese a ko sind hän mir Fliegende Holländer gspielt (in 3 Gruppe). De Torrero het d dreiergruppe all 10 min. losgsigt. So lang mir uf die Grupp gwartet hän mir e Kurzspiel gspielt. Als alli do gse sind hän mir e TABS gmacht, dene sin mir heime glofe und es sind alli ins Bett.

17. Juli 2013

Am morge het uns e Gauklerin gwegt und het gseit, dass mir Sportlichi kleider a ziehn müen. Mir hen uns alli gfreud =). Drnoch hets e wunderbars, extrem guetschmeckends und gnussvolls Zmorge gä. D’Kuchi het eifach e unendlich gueds Teamplay an Start brocht ka. und mir hän das alli super-duper-luper-guper guet gfunde. Nach em super coole Zmorge hets Ämtli gäh. Nach däm hän mir e Vita pacour gmacht, es isch mega astränget gse!! =) Nochhärd hän mir e mega feins Zmittag gäh. D’Ämtli hän mir nach em Zmittag gmacht.
Den hend mir noch em Zmitag e vreieposchtelauf gmacht und döt hend mir schonglire, Sleklein & Danze könne mache. Noch em Postelauf hend mir Burg erkundet und in Pool gsprunge, denoch sind mir go zviri esse! =) Und denoch uft Spielwise. Mir händ zerst Völkerball gspielt und nocher händ mir Joker-Fussball gspielt. Will mir nonig grad perfect gsi sin händ mir uns no e biz trainiert. Noch dem händ mir’s Joker-Fussball none male in drei Gruppene gspielt. Öpe am 6 Uhr sind mir go ne feins Znacht ässe! =P

18. Juli 2013

Nach de Ämtli isch de Gaugler zu uns ko und het uns vorgschlage Party z’mache. Mir händ unser Ufenthat’s Zält verziert und Party het könne los go. Es isch mega cool gsi und mir händ mega abdancet.
Öbe am halb 10i isch d’Party leider beendet worde und mir händ alli Liederbiechli gholt und sind in Wald glofe. Döte händ mir no lang gsunge und sind den go schlofe.
Am morge sind mir am halb 8 Uhr gweckt worde und händ unser Zmorge gässe. Mir händ e Brief beko, was sehr komisch gseh isch, denn mir händ ned gwüsst vo wäm…
Uf eimal het de Gaugler mega a fo schreie, denn sie Amulet isch in vier teil zerbroche.
Nach em Z’Morge simmer denne loos gloffe, mit em Zug gfahre und nomol gloffe.
In Luzern simmer ins Verkehrshuus gange und es supr fresh-dipesh gsih.
Am halb 4i simmer denn wider zruggloffe. Dört isch dr Napoleon uf uns gwartet het und mir händ fr d IP und P Priefig glehrnt. Denne hets doch no irgendwenn Znacht geh wo VÖLLIG zvill Pfeffer het gha. Drführ isch bisher s’esse hammr gsiih. Denne hemmer Emtli gmacht.

19. Juli 2013

Gester hend mir no e Spiel gspielt mit 2 Gaukler. De einti Gaukler isch mega Hyperaktiv gse und de andr isch mega forsichtig gse. Mir hend e art Kennelerspiel gspielt. Das Spiel isch eso gange: me hett sich e lustige aber nid unbedingt wohre Fakt miesse überlege. Und denn hend mir uns innerhalb vo 30 sek. unserem ständig wechselnde gegenüber miesse vorstelle. Hütt am Morge hett uns e zimlich ufdreite und witzige Gaugler gweckt, de gfunde het mir sette zerst z’morge ässe und d ämtli mache.
Nach de Ämtli isch de Gaukler koh und mir hend e Postelauf gm8 ums ganze Lager z verschönere. zB: Origami, Streetart, Bändeli und Windredli. Unter anderem hen mir e Flashmob (uf e art Flashfail). Mir hend no e Spiel gstartet wo me anderi Pfadis us unsere Abteilig „töte“ indem me ihne 3sek. mit emne Gegestand (stoht ufm Zetteli) uf de Rucke tippt.
Nachem Z’Mittag sind mir in verschedeni Gruppe iteilt worde um in diversen Wettkämpfe andere Pfadis und gegen anderen Quartieren anzutreten. Nachdemm mir alli Disipline absolviert hend und d resultät verkündigt worde sind (unser Quartier hett gwunne 😉 ). Dennoch hend mir 1h Freiziet kha und in derre Ziet hett me für d EP Prüefige könne lerne und am 18:30 hett’s denn z’nacht geh. Alli hend d Ämtli gm8. Noch de Ämtli vom Z’nacht händ mer mit ere andere Pfadi e super luschtigs Gländspel gspilt. Es isch so gange: Es hed 4 gruppe gha und jedi devo het e farb gha. Hacke hed me sich au gegesitig könne. S’isch schlussendlich drum gange wer meh Bändeli hed. Das meh eh kleini Schans gah hed zum gwünne gha hed meh aunoh a Poste verdiene könne. Nach dem Spel sind mer go schlofe. In de Nacht isch Taufi ko…….!

20. Juli 2013

Noch m z’Morge isch e‘ Gaukler kho! (e neue Gaukler)
Er hed welle das mer söddä go bade, will mer stinke. =)
Natüerlich händ mer das gmacht will mer de Gaukler nid hän welle verliere. Es isch ebe eso: Vo dr Taufi händ mer erfahre das die Böse Gaukler die Liebe Gaukler für sich händ welle beko, oder immernoh! Dorum wänd mer das Gaukler zu uns kömme! Bim Bade isch es super-toll gse!! =D
Deheime ako händ mer no für t etape Priefige glernt…
E‘ Postelauf und e Lern-staffete hend mer au noh zum IP, P, OP gmacht.
Nach de Staffete heds z’nacht gäh und denoch e Spel mit ganz Insania. Noch m Tabs sind mer denne ho schlofe! =D

21. Juli 2013

Hüt sind mer vo emenere Starfotografin gweckt worde, die mit uns noch m Z’morge e fotoschuting will mache. Noch em Zmorge sind mir vord Bühni gange und händ es KALA-Fotoschuting gmacht. Nochärd sind d Eltere koh.
Dr Ufenthalt vo de Eltere und leider au vo de Banzai, Ixpi, Chipette und Zip isch am 5 z’Änd gange. Nachdäm mir d’Eltere herzhaft verabschiedet hän mir unsere glernte Stoff für d‘ EPs repetiert. Noch em Esse und de Ämtli sind die Theoretische Teil vo de EPs gsi.

22. Juli 2013

Am nächste Morge isch de Stressgaukler koh, und hed welle dass mir EPs fertig mache. Nach de Ämtli isch de Napoleon uns go s gliche säge, also han mir s denn gmacht. Denn hän mir gässe. Nach em ässe isch dr Gaukler ko und het panik gschobe er het gfrogt ka ob mir scho öbis unterno hän und den händ mir Neig seit. Denn isch plötzlich d bösi Gaukler ko. Und mir hän de liebi müesse vor ihm beschütze. Nachdem er gange isch hän mir d’die ka ins im Kala Verbündeti z’suche. Indem mir Kravatte tüschlet hänm Fründschaftsbändeli für anderi gmacht hän und Unterschrifte gsammlet hän. Am 16.30 isch de bösi Gaukler wieder ko und het gseit wenn mir hüt z’Obig no do sin würd er uns vernichte, also sin mir anderi Pfadis go froge, öb mir bi ihne könne schlofe. Nachem Ässe wo hüt P-Lüt gmacht hän sin mir alli go Ämtli mache….
Am Obig hän mir Stammesobig ka. Es het e kleine Fight mit Farbe zwüsche Balsberg und Riedberg gäh. Aber schuschte isch de Obig ribigslos verloffe. E bizelli Sing-Song und ab ins Bett zu de andere Pfadis.

23. Juli 2013

Am negschte Morge hets am halb nüni zmorge gä und denne händ mir Ämtli gmacht.
Nachem zmorge händ mir mit em Sunnebärg e Rugbyspielblock gmacht. Nachdäm händ mir no zum Abschluss s Bömbeli Spiel gmacht. Denn hend mir uns verabschiedet und P Lütlis hend mit uns miesse Kurzspieli spiele. Am halb eins hets z’mittag gääh.
Als mir d Ämtli gmacht hän mir uns in 10 verschiedene gruppe ufteilt. Denne sin mir an de träff punkt vo Insania gange. Dörte isch de Gaukler und d’Aurelia gse und die hän wölle e mega grosses Fescht mache aber nur mit de beschte!!
Also hän mir uns in die Gruppe ufteilt vo mir sind, es sind gmischti Gruppe gse. Es het 5 verschiedeni Pöschte gäh. Bi 1nem het me müsse die Sache noche mache die de Leiter gseit het. Am schluss het gruppe 10 gwunne und het sich mit Wasser absprütze loh wills so heiss gse isch!!
Nach däm hets Z’Vieri gäh. Nach em Z’Vieri isch e mega komische, gstörte, luschtige Gaukler ko. Dä het e Schilt an sich ka wo drufsch gstande isch: SUCHT FLUCHTWEG! TIPP: WASSER. EUER HISTERISCHER GUAKLER.
Also hend mir uns alli ins Badkleid gworfe und sind go TUBE!!! Mega cool!!!
Nach däm mega coole TUBE hets Z’nacht gäh. nach däm mir unsiri ämtli gmacht sin mir alli ans KALA FESChT gange und hän PARTY gmacht!!
Denn sin mir go schlofe.

Ein Tagebuch der letzten vier Tage existiert leider nicht – entweder wurde das Ämtli nicht gleich fleissig wie sonst gemacht, oder die Notizen gingen schlicht verloren… Trotzdem ist nicht zu bezweifeln, dass wir auch in den letzten Tagen eine unglaublich tolle Zeit hatten. Wer das KALA von vorne bis hinten in Farbe noch einmal durchleben will, schaut sich am besten die Fotogalerie auf www.pfadi-region-basel.ch/kala/foto-galerie an.

By | 2014-06-24T14:35:47+00:00 Dienstag, 24. Juni 2014|Berichte/Fotos|0 Kommentare

About the Author:

Hinterlassen Sie einen Kommentar